Saturday, September 21, 2013

അനോണിമസ്‌


വസാനം നീയത്‌ കണ്ടെത്തും....
സ്പാമുകളിലേയ്ക്ക്‌ നീ നിഷ്കരുണം തള്ളിവിട്ട,
പേരറിയാത്ത മെയിലിൽ അറ്റാച്ച്‌ ചെയ്യപ്പെട്ട
ഒരിലപ്പച്ചയെ...

എത്ര ഡിലിറ്റ്‌ ചെയ്താലും
മരിക്കാതെ, വളർന്നുവളർന്ന്
നിന്നിലേയ്ക്ക്‌ മാത്രം വേരോടുന്ന
ഒരിലപ്പച്ച...

നീയെവിടെയായാലും
നിന്റെ ഗന്ധം മണത്ത്‌
ഒരു ഇൻവിസിബിൾ ട്രോജനായി
അവൻ നിന്നെ പിന്തുടരും...,
എന്നെങ്കിലും നിന്റെ ഹൃദയം
ഹാക്ക്‌ ചെയ്യപ്പെടും വരെ......

ചിലപ്പോൾ നിന്റെ എവിജിയുടെ
കത്തി തുളച്ച്‌ അവൻ മരിച്ചുവീണേക്കാം...
പക്ഷെ അവസാന ശ്വാസത്തിലും
നിന്റെ ഐഡി മാത്രമായിരിക്കും
അവനുച്ചരിക്കുക....

ഓരോ ഇലയനക്കത്തിലും
നീ ഒരിലപ്പച്ചയെ ഭയപ്പെടുന്നത്‌
ആത്മാക്കളുടെ തടവറയിലിരുന്ന്
അവൻ സ്വപ്നം കാണും...
ആകാശത്തിലേയ്ക്ക്‌ ചിതറിവീണ
സ്വപ്നങ്ങൾക്കിടയിൽ പ്രതീക്ഷയുടെ
നേർത്ത ചിറക്‌ മുളച്ച്‌ ഒടുവിൽ
വീണ്ടുമൊരു ട്രോജനായി അവൻ പുനർജനിക്കും...
അതുവരെ നിനക്ക്‌ ഓൺലൈനിൽ
വിസിബിളാകാം...

No comments: